HALOL REJISSORNING HAQLI EʼTIROFI

“Rejissyor uchun eng katta mukofot — uning mehnati insonlarga naf keltirayotganini bilishdir. Qolgan barcha mukofotlar esa yillar davomida qilingan halol mehnatning eʼtirofidir.”

Qariyb 34 yildirki, mening hayotim “Oʻzbekiston” teleradiokanali bilan chambarchas bogʻlangan. Shu yillar davomida televideniye men uchun shunchaki kasb emas, balki haqiqiy hayot maktabiga aylandi. Aynan shu dargohda men katta tajriba orttirdim, ustozlarimdan saboq oldim va rejissyorlik sanʼatining sir-asrorlarini oʻrgandim.

Televideniye boshqa ommaviy axborot vositalaridan farq qiladi. U soʻz, tasvir, ovoz, musiqa va inson tuygʻularini birlashtiruvchi betakror sanʼatdir. Shuning uchun ham rejissyor kasbi katta masʼuliyat, sabr va fidoyilikni talab qiladi.

26 iyun — Xalqaro giyohvand moddalarni suiisteʼmol qilish va ularning noqonuniy aylanishiga qarshi kurash kuni munosabati bilan men Oʻzbekiston Respublikasi Prezidenti Administratsiyasi huzuridagi Narkotiklar va oʻqotar qurollarni nazorat qilish agentligi tomonidan “Narkotiklarga qarshi kurashish fidoyisi” koʻkrak nishoni bilan taqdirlandim.

Bu kun men uchun yana bir jihati bilan unutilmas boʻldi. Mukofot topshirilayotgan paytda ham men ish jarayonida edim. Ikkita muhim tadbirdan — musodara qilingan narkotik moddalarni yoqish marosimi va xalqaro sammitdan jonli efirlarni tashkil etish bilan band edim. Bu men uchun eng katta baxt. Chunki efir — mening hayotim, rejissyorlik esa mening taqdirim.

Ushbu mukofotni men katta sharaf deb bilaman. Shu yillar davomida koʻplab shogirdlarim, hamkasblarim davlat mukofotlarini olganida ular bilan birdek quvonganman. Televideniyeda bir hazil gap bor: “Rejissyor doimo kadr ortida qoladi.” Ammo aynan kadr ortida efir dunyosi barpo boʻladi.

Meni samimiy tabriklagan barcha doʻstlarimga, hamkasblarimga, rahbarlarimga, ustozlarimga va shogirdlarimga chin qalbimdan minnatdorchilik bildiraman. Sizning eʼtiboringiz va iliq soʻzlaringiz men uchun har qanday mukofotdan qimmatli.

“Oʻzbekiston” teleradiokanaliga menga bergan katta hayot maktabi, ijodiy muhit va Vatanimizga xizmat qilish imkoniyati uchun cheksiz tashakkur bildiraman.

ҲАЛОЛ РЕЖИССЁРНИНГ ҲАҚЛИ ЭЪТИРОФИ

«Режиссёр учун энг катта мукофот — унинг меҳнати инсонларга наф келтираётганини билишдир. Қолган барча мукофотлар эса йиллар давомида қилинган ҳалол меҳнатнинг эътирофидир.»

Қарийб 34 йилдирки, менинг ҳаётим «Oʻzbekiston» телерадиоканали билан чамбарчас боғланган. Шу йиллар давомида телевидение мен учун шунчаки касб эмас, балки ҳақиқий ҳаёт мактабига айланди. Айнан шу даргоҳда мен катта тажриба орттирдим, устозларимдан сабоқ олдим ва режиссёрлик санъатининг сир-асрорларини ўргандим.

Телевидение бошқа оммавий ахборот воситаларидан фарқ қилади. У сўз, тасвир, овоз, мусиқа ва инсон туйғуларини бирлаштирувчи бетакрор санъатдир. Шунинг учун ҳам режиссёр касби катта масъулият, сабр ва фидойиликни талаб қилади.

26 июнь — Халқаро гиёҳванд моддаларни суиистеъмол қилиш ва уларнинг ноқонуний айланишига қарши кураш куни муносабати билан мен Ўзбекистон Республикаси Президенти Администрацияси ҳузуридаги Наркотиклар ва ўқотар қуролларни назорат қилиш агентлиги томонидан «Наркотикларга қарши курашиш фидойиси» кўкрак нишони билан тақдирландим.

Бу кун мен учун яна бир жиҳати билан унутилмас бўлди. Мукофот топширилаётган пайтда ҳам мен иш жараёнида эдим. Иккита муҳим тадбирдан — мусодара қилинган наркотик моддаларни ёқиш маросими ва халқаро саммитдан жонли эфирларни ташкил этиш билан банд эдим. Бу мен учун энг катта бахт. Чунки эфир — менинг ҳаётим, режиссёрлик эса менинг тақдирим.

Ушбу мукофотни мен катта шараф деб биламан. Шу йиллар давомида кўплаб шогирдларим, ҳамкасбларим давлат мукофотларини олганида улар билан бирдек қувонганман. Телевидениеда бир ҳазил гап бор: «Режиссёр доимо кадр ортида қолади.» Аммо айнан кадр ортида эфир дунёси барпо бўлади.

Мени самимий табриклаган барча дўстларимга, ҳамкасбларимга, раҳбарларимга, устозларимга ва шогирдларимга чин қалбимдан миннатдорчилик билдираман. Сизнинг эътиборингиз ва илиқ сўзларингиз мен учун ҳар қандай мукофотдан қимматли.

«Oʻzbekiston» телерадиоканалига менга берган катта ҳаёт мактаби, ижодий муҳит ва Ватанимизга хизмат қилиш имконияти учун чексиз ташаккур билдираман.

Муборак бўлсин, Насимжон Муин.